اسلام آباد-29 اگست(اے پی پی)نائب وزیراعظم تے وزیر خارجہ سینیٹر محمد اسحاق ݙار ملک دی سفارتی کوششاں کوں “پاکستان دی حالیہ تاریخ اچ ساریاں توں ودھ متحرک دور” قرار ݙیندے خطے اتے دنیا بھر اچ تھیوݨ آلی اہم سفارتی کامیابیاں دا اعلان کیتے۔ وزارت خارجہ اچ میڈیا بریفنگ اچ نائب وزیراعظم جولائی اتے اگست دے دوران تھیوݨ آلے اپݨے اعلیٰ سطح دوریاں، پالیسی مباحثاں اتے کثیرالجہتی مصروفیات دی تفصیل ݙتی اتے علاقائی امن، عالمی رابطہ، تجارت دی بحالی اتے اصولی بین الاقوامی حمایت اچ پاکستان دی خارجہ پالیسی دا واضح بیان ݙتا۔ اقوام متحدہ اچ تاریخی قیادت اتے عالمی سفارتی کامیابیاں دا حوالہ ݙیندے سینیٹر اسحاق ݙار پاکستان دی سلامتی کونسل دی جولائی اچ صدارت دا حوالہ ݙتا اتے آکھیا جو ایں دوران ترائے اہم ایونٹس تھئن، پاکستان ٻہوں ساریاں اجلاساں دی صدارت کیتی جنہاں اچ فلسطین تے ہک اجلاس وی شامل ہئی۔ پاکستان دی قیادت اچ تنازعات دے پرامن حل کیتے ہک متفقہ قرارداد منظور کیتی ڳئی جیڑھی ہک سفارتی سنگ میل اے۔ انہاں آکھیا جو پاکستان عالمی برادری دے سامݨے اپݨے موقف کوں مؤثر طریقے نال پیش کیتے۔ امریکہ اتے یورپ نال تعلقات اچ نویں پیشرفت تھئی، واشنگٹن اچ 28 جولائی کوں امریکی وزیر خارجہ مارکو روبیو نال ݙو طرفہ، علاقائی اتے عالمی امور تے تعمیری ڳالھ مہاڑ تھئی۔ انہاں اٹلانٹک کونسل ڄھیں تھنک ٹینکس توں وی خطاب کیتا جتھاں عدالتی آزادی بارے انہاں دے تبصرے کوں مقامی سیاسی حلقیاں غلط طریقے نال پیش کیتا۔ انہاں وضاحت کریندے آکھیا جو پاکستان اچ عدلیہ آزادانہ طور تے کم کریندی اے، انگریزی بیاناں کوں سیاسی فائدے کیتے موڑݨ افسوسناک اے۔ انہاں یورپی یونین اتے برطانیہ دیاں فضائی پابندیاں دے خاتمے کوں وی سفارتی کامیابی قرار ݙتا۔ پاکستان انٹرنیشنل ایئر لائنز (پی آئی اے) تے یورپی یونین دی پابندی نومبر 2024 اچ ہٹا ڳئی ہئی اتے ہݨ برطانیہ دیاں پابندیاں وی ختم تھی ڳئن۔ ستمبر اچ مانچسٹر کیتے پروازاں ولوں شروع تھیسن۔ اسحاق ݙار فلسطین دے حوالے نال پاکستان دی نہ بدلݨ آلی حمایت دی تصدیق کریندے فرانس اتے سعودی عرب دی مشترکہ میزبانی اچ بین الاقوامی کانفرنس اتے 25 اگست کوں جدہ اچ او آئی سی دے وزرائے خارجہ دے ہنگامی اجلاس اچ اپݨی شرکت دا وی ذکر کیتا۔ انہاں آکھیا جو او آئی سی اچ پاکستان نام نہاد ‘گریٹر اسرائیل’ دے منصوبے کوں واضح طور تے مسترد کر ݙتا، اوکوں ‘غیر قانونی اتے ناقابل قبول’ قرار ݙتا۔ انہاں ایران-اسرائیل تنازعے دے دوران پاکستان دیاں خاموش سفارتی کوششاں دا وی ݙسیا ڄیندے نال ایران پاکستان کوں حقیقی سنڳتی منیے۔ ایرانی پارلیمنٹیرینز آپݨی پارلیمنٹ اچ ‘شکریہ پاکستان’ دے نعرے لائے، اے خود ساݙے سفارتی اقدامات دی کامیابی دی داستان ݙسیندے۔ نائب وزیراعظم تے وزیر خارجہ اسحاق ݙار 20 اگست کوں کابل دے دورے کوں “مفید اتے تذویراتی دورہ قرار ݙتا جتھاں پاکستان، چین اتے افغانستان دے وزرائے خارجہ وچال مہاجرین، سرحدی سلامتی، تجارت اتے انفراسٹرکچر تے ترائے طرفہ ڳالھ مہاڑ تھئی۔ “پاکستان-افغانستان-ازبکستان ریلوے دا معاہدہ وی تھیا اتے چین اصولی طور تے سی پیک کوں افغانستان تئیں ودھاوݨ تے اتفاق کیتے۔ انہاں اے وی تصدیق کیتی جو پاکستان اتے چین 2026 وچ سفارتی تعلقات دے 75 ویں سالگرہ منیسن جیںدے کیتے ثقافتی اتے اقتصادی تقریبات دا ہک سلسلہ ترتیب ݙتا ڳئے۔ چین دی زراعت، کان کنی اتے صنعتی سرمایہ کاری اچ ودھدی ہوئی دلچسپی اے اتے ہک ہزار پاکستانی گریجویٹس کوں اعلیٰ زرعی تعلیم کیتے چین بھیجیا ویندا پئے۔ انہاں آکھیا جو بنگلہ دیش (23-24 اگست) دے دورے دے دوران بنگلہ دیش نیشنل پارٹی (بی این پی) اتے جماعت اسلامی سودھا سارے وݙیاں جماعتاں دے سربراہان نال پورا سفارتی رابطہ کیتے۔ ویزا ختم کرݨ، تجارتی تعاون، اتے ثقافتی تبادلے سودھا ٻہوں سارے شعبیاں اچ چھی یادداشتاں تے دستخط تھئن۔ انہاں سارک دی بحالی کیتے وی زور ݙتا اتے آکھیا جو بنگلہ دیش پرزور حامی اے پر ہک ملک دی مزاحمت ہݨ وی رکاوٹ اے۔ برطانیہ دے اپݨے دورے (17-19 اگست) دے دوران اسحاق ݙار ڈپٹی وزیر اعظم اینجلا رینر، پارلیمنٹیرینز، اتے دولت مشترکہ دے سیکرٹری جنرل نال ملاقات کیتی۔ لندن اچ پاکستان ہائی کمیشن اچ ڈیجیٹل پنجاب لینڈ ریکارڈز اتے ‘ون ونڈو’ پاسپورٹ جاری کرݨ دے نظام سودھا پاکستانی کمیونٹی تے مرکوز وݙیاں خدمتاں متعارف کرائیاں ڳئن۔ نائب وزیر اعظم آکھیا جو پاکستان دی خارجہ پالیسی اقتصادی مفادات نال وابستہ اے، اساں علاقائی ڳالھ مہاڑ اتے عالمی مکالمے کوں تریندے پئے ہیں، ساݙی خارجہ پالیسی اصولاں آلی اے اتے پاکستانی عوام دیاں خواہشات دے مطابق اے۔ انہاں اے وی انکشاف کیتا جو “برطانیہ-پاکستان بزنس ایڈوائزری کونسل” قائم کیتی ڳئی اے تاں جو تجارت اتے سرمایہ کاری ودھے جیندے نال پاکستان دی اقتصادی سفارتکاری دے عزم کوں ٻئی طاقت ملی اے
