مظفر آباد ۔ 15 اکتوبر (اے پی پی) صدرمملکت ممنون حسین آکھے جو اقوام متحدہ مسئلہ کشمیر بارے اقوام عالم نال آپنڑیں وعدیاں کوں پورا کرے ۔ سلامتی کونسل دیاں قرارداداںدے مطابق آزادانہ اتے منصفانہ استصواب رائے دے ذریعے ہی ایں پرانڑیں مسئلے دا حل ممکن ہے، تحریکِ آزادیٔ کشمیر دی حمایت اہلِ پاکستان دے ایمان اتے غیرت دا تقاضا ہے کیونجو اساڈا اہل کشمیر دے نال ایمان، خون، تریخ ، تہذیب اتے ثقافت دا رشتہ ہے ، مقبوضہ کشمیر اچ ساریاں سیاسی قیدیاں کوں ریہا کیتا ونجے اتے خطے دے طویل ترین کرفیو کوں مکایا ونجے ، بھارت آپنڑیں جابرانہ کالے قوانین واپس گھنے اتے کشمیری قیادت کوں باہرے ملک سفر دی اجازت ڈتی ونجے ، انسانی حقوق دے عالمی مبصرین کیتے مقبوضہ کشمیردے بند دروازے کھولے ونجن ، اتے کشمیر کوں غیر فوجی علاقہ قرار ڈتا ونجے ۔ چھنڑ چھنڑ کوں اتھاں کشمیر کونسل تے آزادکشمیر قنون ساز اسمبلی دے مشترکہ اجلاس نال خطاب کریندے ہوئیں صدرمملکت آکھیا جو کشمیر دے خونِ شہیداں دی لالی نال روشن آزادی دے سورج دے طلوع تھیونڑ اچ ہنڑ ودھ دیر کائنی لگی ، تحریکِ آزادیٔ کشمیر آپنڑیں جواں سال شہید اتے ذہین قائد برہان مظفر وانی شہید دے خون دی برکت نال ہک نویں عہد اچ داخل تھی چکی ہے۔صدرمملکت آکھیا جو کشمیر دے نونہالاں قابض فوج دیاں سنگینیاں دا مقابلہ آپنڑیں نکے نکے ہتھاں اچ غلیل گھن تے کیتا۔ اساڈے نڈر بے خوف اتے ہتھوں خالی کشمیری نوجوان بھاہ سٹنڑ آلے ٹینکاں دے سامنڑیں سینہ چوڑا کر تے کھڑے ہن۔ صدر مملکت آکھیا جو اساں عالمی برادری توں اپیل کریندے ہوئیں آکھیا جو او ایں صورت ِ حال تے توجہ ڈیوے کیونجو حالات دا وگاڑ جیکر ایں طرح ایں رفتار نال جاری ریہا اتے عالمی اداریاں اتے انسانی حقوق دیاں تنظیماں کوں مقبوضہ کشمیر دی صورتِ حال دا جائزہ گھنڑ دی اجازت نہ ڈتی گئی تاں ایندے نتیجے اچ کئی وڈا اتے سنگین انسانی سانحہ وی جنم گھن سگدے ، جیکوں روکنڑ دی ذمہ داری عالمی برادری تے آندیاں ہن ۔
